Վահան Տերյանը բացառիկ դեմք է 20-րդ դարի հայ պոեզիայի պատմության մեջ: Նա հեղաշրջեց գեղարվեստական մտածողությունը՝ բերելով նոր աշխարհայացք, պատկերային նոր համակարգ, նոր գրական լեզու, չափածո խոսքի ներդաշնակության միանգամայն նոր արվեստ: Նա անսահման նրբություն եւ երաժշտականություն հաղորդեց բանաստեղծությանը եւ միանգամայն նոր կյանք պարգեւեց գրականությանը: Նրանից հետո այլեւս հնարավոր չէր գրել անցյալի գրողների նման:
ԿՅԱՆՔԸ: Վ. Տերյանը (Տեր-Գրիգորյան) ծնվել է 1885 թ. փետրվարի 9-ին Ջավախքի Գանձա գյուղում: Նրա նախնիները 1830-ին Ջավախքում վերաբնակություն էին հաստատել Կարինի Կարճնկոց գյուղից: Տոհմագրությունն սկսվում է տեր Ղազարից, նրա որդի Գրիգորից, որի որդին՝ Սուքիասը (1840-1914), ապագա բանաստեղծի հայրն էր:
Տեր-Սուքիասը 1850-1859 թթ. ուսանել է Ախալքալաքի հոգեւոր դպրոցում: Ուսման տենչն այնքան ուժեղ էր նրա մեջ, որ այդ նպատակով ծնողներից գաղտնի որոշում է ոտքով հասնել… Փարիզ եւ կրթության ստանալ Մուրատ-Ռափայելյան վարժարանում: Սակայն Կարինի գյուղերից մեկում հոր ուղարկած մարդիկ գտնում են նրան եւ ետ վերադարձնում: Հայրը ազատամիտ Սուքիասին ամուսնացնում է հարեւան՝ Չամդուրա գյուղի տիրացուի աղջկա՝ Յուղաբերի հետ: Սուքիասը դառնում է քահանա եւ շարունակում հոր սկսած եկեղեցու շինարարությունը: Սակայն նրա ուսումնատենչությունը չի անցնում: Ինքնուրույն սովորում է ռուսերեն, ֆրանսերեն. կարդում է հատկապես փիլիսոփայական, գիտական գրականություն, որպեսզի չկտրվի ժամանակի գրական, քաղաքական անցուդարձից: Մայրը նուրբ, զգայուն եւ աշխատասեր կին էր:
Ըստ հուշագիրների՝ ապագա բանաստեղծն ավելի նման էր Թորոս հորեղբորը: Վերջինս, ինքնուս լինելով, տարված էր Գյոթեի «Երիտասարդ Վերթերի տառապանքները» գրքով, որը շարունակ կարդում էր եւ հուզմունքից արտասվում: Նաեւ բանաստեղծություններ էր գրում: Ահա գրի, գրքի հանդեպ ունեցած այս քնքշությունն է, որ հորից ու հորեղբորից փոխանցվում է Տերյանին:
Վահանը չորս եղբայրներից եւ չորս քույրերից կրտսերն էր: Նա հանդարտ երեխա էր՝ բոլորից սիրված: Գրագիտության առաջին դասերն ստանում է հոր ու եղբայրների խնամքի ներքո: Նրա մանկությունն անցել է Ջավախքի անկրկնելի բնաշխարհում՝ նահապետական բարքերի մեջ:
Տերյանը նախնական կրթությունն ստացել է Գանձայում եւ Ախալքալաքում: 1897 թ. հայրը նրան տեղափոխում է Թիֆլիս, որտեղ երկու տարի ուսանում է պետական գիմնազիայում: Սակայն տեր Սուքիասը նրան ավելի մեծ ասպարեզ էր ուզում հանել, եւ 1899 թվականից Տերյանը դառնում է Մոսկվայի Լազարյան ճեմարանի սան՝ կրթությունը շարունակելով արեւելյան լեզուների երրորդ դասարանում: Ճեմարանական ուսումնառության շրջանը (1899-1906) նրա մտավոր ձեւավորման լավագույն ժամանակն է:
Այս տարիներին անհագ հետաքրքրությամբ նա կարդում է ռուս եւ եվրոպական գրողներին, հաղորդակցվում գեղագիտական նոր ուղղություններին, գրական նոր դպրոցներին, որոնցից նրան հատկապես գրավում է խորհրդապաշտությունը:
Ընկերների հետ լույս է ընծայում «Հույս» թերթը: Շվին եւ Volo ծածկանուններով հանդես է գալիս խմբագրական եւ առաջնորդող հոդվածներով: Այս տարիներին է վերաբերում նրա «Բայրոնի «Չայլդ Հարոլդը» եւ Սմբատ Շահազիզի «Լեւոնի վիշտը» գրականագիտական վերլուծությունը: Իսկ ճեմարանի «Մեր կյանքը» աշակերտական թերթում տպագրվում են Թումանյանի եւ Իսահակյանի ազդեցությամբ գրված նրա առաջին բանաստեղծությունները («Կարկուտը եկավ…», «Սարեր ու ձորեր…»): 1904-ին ճեմարանում ծանոթանում է Իսահակյանի, իսկ ավելի ուշ՝ 1908-ին՝ Թումանյանի հետ, ովքեր նրա ստեղծագործական ձեւավորման գործում ունենում են նշանակալի տեղ:
1905-ի ամռանը հայրենի բնաշխարհում՝ Սաղամո լճի ափին, Տերյանը մասնակցել է Վարդավառի տոնակատարությանը: Ներկա է եղել նաեւ Իսահակյանը, որը եւ հետագայում գրի է առել Տերյանի այդ պահի դիտարկումները. «Նայի՛ր,- ասում էր Վահանը ինձ,- ա՜խ, ի՜նչ տխուր աչքեր ունեն մեր գյուղացիները, ի՜նչ մտահոգ դեմքեր՝ արեւով, անձրեւով այրված ու բովված: Ի՜նչ դառն աղքատություն է կաթում վրաներից, բայց ուրախանում են: Բայց ի՜նչ թախծոտ ուրախություն է այս: Իբրեւ թե ուրախ երգեր են երգում, բայց ինչքա՜ն վիշտ ու մորմոք կա սրանց ուրախ երգերի մեջ: Դարերի տառապանքն է խոսում սրանց բերանով: Այս ժողովրդին մեր ինտելիգենցիան չի կարող հասկանալ, ո՞ւր մնաց օտարը: Մեր նոր գրողներից Թումանյանը եւ դու, միայն երկուսդ, զգում եք մեր ժողովրդին: Ձեզանից հետո կամ նոր, բոլորովին նոր երգ պիտի ասել, կամ պիտի լռել»:
Եվ Տերյանն ասաց նոր խոսքը, որն աստիճանաբար ձեւավորվող «Մթնշաղի անուրջներ» ժողովածուն էր:
Գրքի առաջին բանաստեղծությունները մամուլում տպագրվել են 1906-ին՝ Վահան Շվին եւ Վահան Տեր-Գրիգորյան ստորագրություններով: Իսկ 1908-ին Վահան Տերյան ստորագրությամբ լույս է տեսնում նրա «Մթնշաղի անուրջներ» ժողովածուն, որն իրենով մի նոր դարագլուխ է բացում հայ գրականության մեջ: Գրքում զետեղված էր 72 բանաստեղծություն:
Տերյանի գրական մուտքը շռնդալից էր: Նրան ողջունում են Հովհ. Թումանյանը եւ Ավ. Իսահակյանը: Դա ոգեպնդում է նրան. «Երկուսիդ կարծիքը բացարձակ արժեք ունի ինձ համար, այլեւս քննադատությունից վախ չունեմ»:
1914 թ. օգոստոսին սկսված Երկրորդ աշխարհամարտին Տերյանն արձագանքում է հոդվածներով (որոնցից առանձնահատուկ է «Հոգեւոր Հայաստանը») եւ հայրենասիրական բանաստեղծություններով: Տերյանը շատ ծանր տարավ մեծ եղեռնի անասելի ողբերգությունը:
Ավարտելով ճեմարանը՝ նույն 1906 թ. նա ուսումը շարունակում է Մոսկվայի համալսարանի պատմաբանասիրական բաժանմունքում՝ ռուսաց լեզու եւ ռուս գրականություն մասնագիտությամբ, որն ավարտում է 1912 թ.՝ պետական քննությունները հետաձգելով հաջորդ ուսումնական տարվան: 1906 թ. դեկտեմբերի 3-ին հակաինքնակալական գործողությունների մեղադրանքով Տերյանը ձերբակալվել է եւ 10 օր կալանավորվել Մոսկվայի հայտնի Բուտիրյան բանտում: Հանցակազմի բացակայության պատճառով դեկտեմբերի 13-ին ազատ է արձակվել:
1910-1912 թթ. Տերյանը հիմնադրում եւ համախոհների հետ լույս է ընծայում □Գարուն□ ալմանախը: Լույս է տեսնում երեք համար, որոնց մեջ ի մի են բերվում արեւելահայ եւ արեւմտահայ գրողների երկերը:
Լույս են տեսնում նաեւ գրականագիտական-քննադատական ուսումնասիրություններ: Տերյանը հակված էր նորոգելու գեղարվեստական-քննադատական մտածողությունն ամբողջությամբ եւ բերելու գրական նոր մշակույթ՝ ընդգրկելով նաեւ թարգմանական գործը:
1911 թ. փետրվարին Տերյանն ամուսնանում է նորնախիջեւանցի Սուսաննա Պախալովայի (1887-1936) հետ, որը ծնողների հետ ապրում էր Ստավրոպոլում: Շուտով պարզվում է, որ Սուսաննան հիվանդ է թոքախտով, որով վարակվում է նաեւ նյութական զրկանքներից մշտապես անապահով, թափառական կյանք վարող բանաստեղծը:
1912-ին լույս է տեսնում «Բանաստեղծություններ» վերնագրված նրա երկրորդ գիրքը, որի մեջ զետեղում են վերամշակված «Մթնշաղի անուրջները» եւ նոր շարքեր: Դա Տերյանի հրատարակած վերջին գիրքն էր: Հետագայում գրածները մեզ են հասել կա՛մ մամուլում տպագրված վիճակում, կա՛մ որպես անտիպ ժառանգություն:
1912 թ. հիմնադրում է «Պանթեոն» հրատարակչությունը եւ ծավալում գրահրատարակչական, թարգմանական լայն գործունեություն:
1913-ին հայտնի գիտնականներ՝ պատմաբան Նիկողայոս Ադոնցի եւ լեզվաբան Նիկողայոս Մառի հորդորներով եւ աջակցությամբ դառնում է Պետերբուրգի համալսարանի արեւելյան լեզուների բաժանմունքի ուսանող: 1913-1917 թթ. Տերյանը ապրում եւ ստեղծագործում է Պետերբուրգում:
Այս տարիներին նրան ոչ միայն բարոյական, այլեւ նյութական աջակցություն է ցույց տալիս Հովհ. Թումանյանը, իսկ 1914-ի սկզբին նրան ընդունում է իր ղեկավարած Հայ գրողների կովկասյան ընկերության անդամ: Տերյանն աստիճանաբար կապվում է հայ իրականության հետ, աշխատակցում է «Մշակ» լրագրին:
1914 թ. ապրիլի 30-ին Թիֆլիսի երաժշտական ընկերության դահլիճում Տերյանը հանդես է գալիս «Հայ գրականության գալիք օրը» զեկուցմամբ, որը տեւել է երկու ժամ: Այդ զեկուցմամբ Տերյանը տեսական ձեւակերպում էր տալիս հայ գրականության մեջ սկիզբ առած նոր դարաշրջանին: Այդ իսկ պատճառով այն ունի գրական հրովարտակի նշանակություն: Մեկ այլ դասախոսությամբ՝ «Հայոց նոր շրջանի բանաստեղծության ոճի ու լեզվի զարգացման մասին», 1917 թ. հունվարին Տերյանը հանդես է եկել Երեւանում:
1915-1916 թթ. մասնակցում է Վ. Բրյուսովի եւ Մ. Գորկու կազմած ու խմբագրած «Հայաստանի պոեզիան» եւ «Հայ գրականության ժողովածու» գրքերի ստեղծման աշխատանքներին: Հայերենից ռուսերեն է թարգմանել Գ. Սունդուկյանի «Պեպոն», Րաֆֆու «Կայծերի» առաջին հատորը, Շիրվանզադեի «Չար ոգին»:
Նա նաեւ հայերեն է թարգմանել ռուս եւ եվրոպական գրողների առանձին երկեր՝ Ֆեոդոր Սոլոգուբ, Վալերի Բրյուսով, Էմիլ Վերհարն, Պոլ Վերլեն, Շարլ Բոդլեր եւ ուրիշներ:
1917 թ. Հոկտեմբերյան հեղափոխությունից հետո Վ. Տերյանը եռանդուն գործունեություն է ծավալում քաղաքական ասպարեզում: Նա աշխատում է Ազգությունների գործերի ժողովրդական կոմիսարիատին կից Հայկական գործերի կոմիսարիատում, որը գործում էր նախ՝ Պետրոգրադում, ապա՝ Մոսկվայում: Գրում է «Թուրքահայաստանի մասին» զեկուցագիրը եւ նախապատրաստում օրինագիծը: Որպես խորհրդային պատվիրակության խորհրդական՝ 1918-ի հունվարին մասնակցում է Բրեստ-Լիտովսկի հաշտության բանակցություններին:
1918-ին Ազգությունների գործերի ժողովրդական կոմիսարիատի հանձնարարությամբ գաղթական հայությանն օգնելու նպատակով մեկնում է Կովկաս: Տանում է երկու վագոն դեղորայք, հագուստ եւ գումար (6. 194. 789 ռուբլի): Տերյանը լինում է Աստրախան, Պյատիգորսկ, Էսենտուկի, Միներալնիե Վոդի քաղաքներում: Ճանապարհորդել է գնացքով, ավտոմեքենայով, ուղտով, ոտքով… Նա կարողանում է մասնակիորեն հոգալ հայ գաղթականների կարիքները, կազմակերպել հիվանդների բուժումը, հագուստ եւ դրամ բաժանել նրանց:
1919 թ. աշնանը, այս անգամ Ռուսաստանի արտաքին գործերի ժողովրդական կոմիսարիատի հանձնարարությամբ, մեկնում է Միջին Ասիա՝ Տաշքենդ. ճանապարհն անցնում էր Սամարայով եւ Օրենբուրգով: Տերյանը Ռուսաստանի կառավարության անդամ էր: Նրան տրված գործուղման վկայականում գրված էր, որ մեկնում է «շտապ եւ կարեւոր հանձնարարությամբ»: Ճանապարհորդությունը Տաշքենդից հետագայում պետք է շարունակվեր Պարսկաստան եւ Թուրքիա: Դժվարին եւ ծանր տարիներ էին՝ երկիրը տնտեսապես քայքայված էր, կապերը խզված էին, շարունակվում էր կարմիրների ու սպիտակների քաղաքական, ռազմական առճակատումը: Տերյանը 1916-ից հիվանդ էր թոքախտով: Ճանապարհին հիվանդությունը խորանում է, եւ նա 1920 թ. հունվարի 7-ին վախճանվում է Օրենբուրգում: Այստեղ էլ թաղվում է: Հետագայում նրա աճյունը փոխադրվում է Երեւան եւ հողին հանձնվում Կոմիտասի պանթեոնում:
Տերյանը կանխազգացել է իր մահը եւ տարբեր բանաստեղծությունների մեջ գրել.
Ինձ թաղեք, երբ տխուր մթնշաղն է իջնում,
Երբ լռում են օրվա աղմուկները զվարթ,
Երբ շողերն են մեռնում, ծաղիկները – ննջում,
Երբ մթնում կորչում են լեռ ու արտ: